A promotora inmobiliaria asina un acordo con Nedgia, filial de distribución de gas do grupo Naturgy, para a instalación de sistemas adaptados que posibiliten a subministración de biometano a unhas 500 vivendas que ten en desenvolvemento.
- Luis García Malo de Molina, director de Operacións de AEDAS Homes: “Con este acordo, a compañía dá un paso de xigante polo respecto ao medio ambiente aproveitando o biometano como combustible renovable e potenciando a economía circular”.
- Vicente Gramuntell, director de Operacións de Nedgia: “Este acordo ilustra o compromiso de Nedgia coa descarbonización, poñendo as súas redes de distribución ao servizo de solucións que promovan un desenvolvemento enerxético sostible.”
AEDAS Homes, promotora de vivendas de referencia a ámbito nacional, e Nedgia, a filial de distribución de gas do grupo Naturgy, aliáronse para levar por primeira vez o gas renovable á promoción de vivendas mediante a instalación certificada de sistemas adaptados para a subministración de biometano. Con estas iniciativa, AEDAS Homes convértese na primeira compañía do sector promotor inmobiliario que substitúe o gas natural polo biometano no mercado residencial para a subministración en probas das instalacións.
O biometano é un gas renovable que se obtén a partir de residuo orgánico e que posúe as mesmas propiedades que o gas natural, o que permite que este sexa vehiculado polas redes actuais de gas e poida consumirse nas vivendas sen modificar as instalacións de subministración. Actualmente, España ten o terceiro maior potencial de produción de biometano en Europa, o que posibilita a xeración dunha enorme riqueza para o conxunto do país e para aqueles territorios que concentran un maior volume de residuos.
“Con este acordo de implantación do biometano nas promocións para a subministración provisional necesaria para as probas de instalacións, AEDAS Homes dá un novo paso para ser o referente en sostibilidade no sector da vivenda de obra nova e reducir a pegada de carbono operacional dos seus proxectos”, asegura Luis García Malo de Molina, director de Operacións de AEDAS Homes.
Deste xeito, a compañía inmobiliaria marca un fito no sector da nova edificación residencial grazas a Nedgia na subministración de gas nas promocións de vivendas en España. “Por primeira vez”, remarca Luis García Malo de Molina, “unha promotora cambia o gas natural polo biometano, un gas renovable limpo, inesgotable, con emisións neutras de CO2, que contribúe a combater o cambio climático e co que se potencia a economía circular, feito que supón un paso de xigante polo respecto ao medio ambiente”.
“Este acordo ilustra a ambición de Nedgia e o grupo Naturgy por descarbonizar as súas redes de distribución e converterse nun referente na busca de solucións enerxéticas que promovan un desenvolvemento enerxético sostible”, explica Vicente Gramuntell, director de Operacións de Nedgia.
O Grupo enerxético está a desempeñar un papel clave no despregamento do biometano a través dos seus 57.000 quilómetros de redes. En 2022, o gas renovable que circulou polas redes de Nedgia creceu un 90%, ata acadar os 35 GWh. “O biometano ofrece a vantaxe de proporcionar unha enorme flexibilidade ao ser un gas equiparable ao gas natural, ademais, permite aproveitar a extensa infraestrutura gasista existente, o que reduce o esforzo investidor e de adaptación para lograr a súa rápida penetración”, engade Vicente Gramuntell.
Grazas ás novas garantías de orixe —semellantes ás xa existentes para a electricidade producida con renovables—, cada MWh de gas 100% renovable dá lugar á emisión dunha garantía de orixe con información sobre onde, cando e como se produciu o gas. En consecuencia, estas garantías achegan un valor engadido á hora de comercializalo, que fomenta o consumo apoiado no conseguinte beneficio ambiental.
Acerca de AEDAS Homes
AEDAS Homes (2016) é unha promotora residencial pura de referencia en España que impulsou preto de 300 proxectos con máis de 17.000 vivendas nos mercados máis dinámicos do país. Neste breve período converteuse, ademais, nunha icona da innovación, a sostibilidade, a industrialización, o rigor e a profesionalidade no sector inmobiliario.
A compañía dispón dunha carteira de solo residencial finalista para desenvolver máis de 15.000 vivendas nas áreas clave do país, tanto a ámbito inmobiliario como económico, e desenvolve a súa operativa a través de seis Direccións Territoriais en 13 CC. AA., 20 provincias e máis de 50 municipios: Centro, Cataluña e Aragón, Levante e Baleares, Andalucía e Canarias, Costa do Sol e Norte.
Para máis información: aedashomes.com
Acerca de Nedgia
A filial do grupo Naturgy é a compañía líder na actividade de distribución de gas natural en España, onde opera en 11 comunidades autónomas e 1.150 concellos. Conta con máis de 5,4 millóns de puntos de subministración que supoñen o 70 % dos consumidores. O seu principal activo son os 57.000 quilómetros de redes que permiten facer chegar hoxe, de forma segura e eficiente, a subministración enerxética de gas natural e de gas renovable (biometano), así como de hidróxeno no futuro. A innovación, proximidade e atención ao cliente forman parte da súa razón de ser e caracterizan a súa actividade.
Naturgy é un grupo enerxético multinacional presente no negocio da electricidade e o gas. A compañía mantén unha aposta decidida pola produción e a distribución do gas renovable, con tres plantas en operación e unha cuarta en proceso, ademais dunha carteira adicional de preto de 60 proxectos en diferentes fases de desenvolvemento que lle permitirán incorporar nova produción deste gas renovable no curto e medio prazo en España, o terceiro país con maior potencial de produción de biometano de Europa.
Para máis información: nedgia.es
