A instalación, impulsada polo Consorci per a la Gestió dels Residus del Vallès Oriental e o Consorci Besòs Tordera, produce biometano a partir da xestión de 55 000 toneladas de residuos orgánicos e da depuración de 12 millóns de m3 de augas residuais ao ano.
- A planta prevé inxectar anualmente 4 GWh de gas renovable na rede de Nedgia, a distribuidora de gas do grupo Naturgy, o que equivale ao consumo de 4800 fogares, e poderá alcanzar ata os 27 GWh de produción.
- É a sexta planta de biometano que a compañía conecta á súa rede en España e a primeira en España con orixe EDAR e residuos.
- Este proxecto, que podería chegar a superar as 9000 t de emisións evitadas, permite a Cataluña seguir avanzando significativamente na redución de de gases de efecto invernadoiro, a penetración de enerxía renovable e a economía circular, transformando os residuos nun recurso enerxético de alto valor.
Nedgia, a distribuidora de gas do grupo Naturgy, empezou a inxectar na súa rede o gas renovable procedente do proxecto BioVO, que xera biometano a partir de residuos orgánicos e da lama extraída das augas residuais no municipio de Granollers (Barcelona).
O proxecto BioVO está promovido polo Consorci per a la Gestió dels Residus del Vallès Oriental e o Consorci Besòs Tordera, e conta coa UTE Facsa-Transparenta como empresa adxudicataria do deseño, a obra e a explotación, así como da explotación da EDAR, producirá 4 GWh ao ano de biometano, o que equivale ao consumo de 4800 fogares, e evitará a emisión á atmosfera de 1472 toneladas anuais de CO2. A planta podería incrementar esta cifra ata a inxección de 27 GWh, o que supoñería unha redución de emisións de CO2 de ata 9700 t.
Este biometano obtense a partir da xestión de 55 000 toneladas anuais de residuos orgánicos da Planta de Dixestión Anaeróbica e de Compostaxe do Consorcio para a Xestión do Residuos do Vallès Oriental. Os residuos tratados ampliaranse ata 80 000 toneladas cando finalice a primeira fase de ampliación da Planta de Dixestión Anaeróbica e alcanzarán as 100 000 nunha segunda fase. O gas renovable tamén procede do biogás xerado a través do tratamento das lamas extraídas durante os procesos de depuración dos 12 millóns de m3 de augas residuais que trata anualmente a Estación Depuradora de Augas Residuais (EDAR) Granollers.
Raúl Suárez, CEO de Nedgia, apuntou que “este proxecto é o sexto que Nedgia conecta á súa rede en España e representa o paradigma da colaboración público-privada para o desenvolvemento dos gases renovables”. “En Nedgia seguimos avanzando para aproveitar o elevado potencial que ten o noso país, o terceiro maior de Europa, e as oportunidades que están a xurdir en todo o territorio para que os gases renovables contribúan á descarbonización”, engadiu Suárez.
Pere Rodríguez, presidente do Consorci del Vallès Oriental, destacou que “cremos que a transición enerxética debe chegar á sociedade tamén mediante as actuacións lideradas polas administracións públicas. BioVO é un claro exemplo diso e unha clara aposta territorial no desenvolvemento das renovables e a descarbonización. Esta planta permitiranos diminuír a pegada de carbono das dúas instalacións e colaborar co desenvolvemento da economía circular optimizando o aproveitamento enerxético dos recursos que xeran a Planta de Dixestión Anaeróbica e de Compostaxe e a Estación Depuradora de Augas Residuais”.
Òscar Sierra, presidente do Consorci Besòs Tordera, afirmou que “BioVO representa a consolidación dun obxectivo común de dúas administracións públicas do ámbito local cara á neutralidade enerxética dos seus procesos. A conversión en BioVO do biogás producido en ambas as dúas instalacións en biometano e a súa posterior inxección na rede gasista, pon a disposición dos cidadáns a posibilidade do uso de gas renovable directamente nos seus domicilios ou industrias, complementando o aproveitamento enerxético que este tipo de instalacións de saneamento e tratamento de residuos xa realizan, nos seus propios procesos, do biogás producido”.
Pola súa banda, Francesc Roca, xerente da UTE Facsa-Transparenta, manifestou que “o proxecto é un exemplo real de economía circular e de colaboración público-privada, onde foi imprescindible a implicación de múltiples actores para superar a elevada complexidade, tanto técnica coma administrativa, do proxecto. Por outro lado, como operadores da depuradora conseguimos unha redución significativa da pegada de carbono desta, debido á alta eficiencia do proceso”.
A contribución de Nedgia á descarbonización do sector
Coa posta en marcha deste proxecto, Nedgia garante a inxección en rede doutros 4 GWh/ano de biometano (que poderían incrementarse ata os 27), contribuíndo así á penetración de gas renovable a través da súa infraestrutura. A distribuidora de gas do grupo Naturgy alcanza, con esta planta, o fito relevante de seis instalacións de xeración de biometano conectadas á súa rede, catro delas situadas en Cataluña, cunha capacidade de inxección conxunta de 142 GWh/ano.
A planta Elena, en Cerdanyola del Vallès (Barcelona), foi a primeira en inxectar á rede de distribución de gas de España gas renovable procedente de vertedoiro. Seguiulle o proxecto Biogasnalia, en Burgos, cuxo residuo é de orixe agroindustrial. En Lleida, ten conectada a granxa Torre Santamaría, que inxecta biometano con orixe de residuo gandeiro e, na Coruña, a Edar de Bens, que achega biometano procedente de augas residuais. Recentemente, a compañía empezou a inxectar tamén en Els Hostalets de Pierola o biometano producido a partir dos residuos urbanos do depósito controlado de Can Mata.
Proxecto BioVO
O obxectivo deste proxecto é a xeración de biometano a través do aproveitamento do biogás que se xera nos procesos de tratamento na Planta de Dixestión Anaeróbica e de Compostaxe do Consorci per a la Gestión dels Residuos del Vallès Oriental e na Estación Depuradora de Augas Residuais (EDAR) Granollers del Consorci Besòs Tordera.
A instalación conta cunha planta de limpeza e purificación de biogás, mediante a tecnoloxía de membranas de Bright Renewables; un gasómetro con capacidade para 1250 m3 e un módulo de inxección de biometano na rede de Nedgia. O proxecto utiliza o biogás procedente das instalacións da EDAR e a planta de xestión de residuos orgánicos procedentes da recollida selectiva, estimado agora en 661 036 Nm3/ano e que podería alcanzar os 3,26 millóns de Nm3/ano.
O proxecto, cun custo previsto de 2 775 000 euros, recibiu unha subvención de 1 012 944,76 euros por parte do Instituto para a Diversificación e Aforro da Enerxía (IDAE) a través dos Fondos Europeos de Desenvolvemento Rexional da Unión Europea (FEDER) ao tratarse dunha iniciativa que favorece unha economía baixa en carbono e, polo tanto, un crecemento sostible. O resto vai a cargo dos dous consorcios.
Unha oportunidade para Cataluña
Cataluña é a quinta comunidade autónoma con maior potencial de produción de biometano, máis dun 8 % do total en España, suficiente para descarbonizar a totalidade do consumo doméstico-comercial da comunidade, e sitúase en terceira posición en potencial de produción de biometano a partir de residuos de augas residuais.
Segundo un recente informe da consultora Biovic e PWC para Sedigas, desenvolver na súa totalidade o potencial de biometano en Cataluña implicaría a construción de 248 plantas, e un investimento total de 3616 M€ entre plantas e redes, o que contribuiría significativamente á creación de emprego local.
Neste sentido, cabe destacar que este proxecto conta precisamente co respaldo de Biovic, especializada na enxeñaría, execución e posta en marcha de plantas de biogás, biometano e hidróxeno verde, así como en consultoría ambiental, de valorización de residuos e de enerxías renovables.
Sobre Nedgia
Nedgia, distribuidora de gas do grupo Naturgy, é a compañía líder na actividade de distribución de gas natural en España, onde opera en 11 comunidades autónomas e 1150 concellos. Conta con máis de 5,4 millóns de puntos de subministración que supoñen o 70 % dos consumidores. O seu principal activo son os 57.000 quilómetros de redes que permiten facer chegar hoxe, de forma segura e eficiente, a subministración enerxética de gas natural e de gas renovable (biometano), así como de hidróxeno no futuro. A innovación, proximidade e atención ao cliente forman parte da súa razón de ser e caracterizan a súa actividade. Nedgia mantén unha aposta decidida polos gases renovables e a súa incorporación ás infraestruturas do sistema de gas: conta con 6 plantas de biometano en operación, que inxectan na súa infraestrutura de redes, e unha carteira adicional de máis de 200 proxectos en diferentes fases de desenvolvemento que lle permitirán incorporar nova produción deste gas renovable no curto e medio prazo en España, o terceiro país con maior potencial de produción de biometano de Europa.
Sobre o Consorci per a la Gestió dels Residus del Vallès Oriental
En 1998 iniciouse o procedemento para aprobar e constituír o Consorci per a la Gestió dels Residus del Vallès Oriental, coa aprobación dos seus estatutos, a instancia do Consell Comarcal e varios concellos da bisbarra, coa finalidade de realizar a creación, xestión e prestación de forma unificada de servizos e actividades de interese común en materia de residuos, así como xestionar, mediante delegación expresa dos seus membros, todas aquelas actividades e servizos vinculados co seu obxecto e finalidades, que se recollían no artigo 1 dos estatutos. O proceso culmina, na constitución do Consorci o 2 de xuño de 1998 e a súa posterior inscrición no Rexistro de Entidades Locais de Catalunya.
Durante os seus 25 anos de funcionamento, o Consorci centrou os seus esforzos na creación de infraestruturas: como a planta de dixestión anaeróbica e de compostaxe e a planta de transferencia de residuos, ambas as dúas en proceso de ampliación e mellora; a rede de puntos limpos e a actual planta BioVO, para dar resposta á xestión e o tratamento de residuos. Tamén traballou no apoio ás políticas municipais de recollida selectiva, e o financiamento de estudos que permitisen o desenvolvemento destas políticas e determinasen as súas necesidades. O Consorci neste tempo apostou pola prevención de residuos e o fomento da reciclaxe con campañas informativas e proactivas dirixidas á cidadanía e creou espazos de debate e investigación no ámbito dos residuos.
O Consorci per a la Gestió dels Residuos del Vallès Oriental traballa para facer máis eficientes e sostibles tanto as súas instalacións coma os servizos que presta, impulsando as enerxías renovables e o aforro enerxético e contribuíndo así á transición enerxética.
Sobre o Consorci del Besòs Tordera
O Consorci Besòs Tordera é unha Administración local con natureza administrativa e personalidade xurídica plena, que figura inscrita no Rexistro de Entes Locais de Catalunya, estando recoñecida como Entidade Local da Auga (ELA). Está integrado por 68 entes, dos cales 64 son municipios das comarcas do Barcelonés, Moianès, Osona, Vallès Occidental e Vallès Oriental, cunha poboación de arredor de 2 400 000 habitantes. As súas liñas principais de actuación son o saneamento en baixa (redes de sumidoiros municipais), o saneamento en alta (control de verteduras, colectoras, bombeos e estacións depuradoras de augas residuais -EDAR-), a mellora do medio fluvial, a innovación e a investigación, a promoción e educación ambiental -a través da Fundación RIVUS- e o apoio aos entes consorciados.
Actualmente xestiona 27 sistemas de saneamento, máis de 300 km de colectores e 55 estacións de bombeo. Dos 64 municipios, 51 delegáronlle as súas funcións como administración actuante en materia de saneamento, cunha poboación servida de máis de 500 000 habitantes e máis de 5000 establecementos industriais conectados á rede de saneamento. O Consorci Besòs Tordera traballa para facer máis sostibles e autosuficientes as súas instalacións, coa xeración e aproveitamento enerxético do biogás nas súas EDAR de maiores dimensións, convertendo os residuos en recursos, e coa instalación de placas solares fotovoltaicas en todas as súas plantas de tratamento.
Sobre Facsa e Transparenta
Transparenta nace da alianza de Facsa e Calaf Grup co obxectivo de implementar un novo xeito de facer na xestión do ciclo integral da auga en Catalunya cunha visión innovadora, orientada á cidadanía e á sostibilidade. Facsa, con 150 anos de experiencia na xestión do ciclo integral da auga, e Calaf Grup, de orixe catalá e cunha traxectoria de máis de 55 anos en todo tipo de proxectos de edificación, rehabilitación, obra civil e obras vinculadas ao ciclo da auga, crean un tándem estratéxico único no sector, que dota Transparenta dunha grande experiencia, un profundo coñecemento do territorio e unha solvencia técnica.